Festival ‘What About Kuching’ majak tebilang

Abdul Karim (empat kiba) bejadi Festival 'What About Kuching'. Bela dipeda Snowdan (tiga kiba) enggau Lee (tiga kanan).

Dikarang Chris Bishop

KUCHING, April 16: Festival dagang temuai ‘What About Kuching’ (WAK) deka nyadi sebengkah festival ti dikemegah Negeri Sarawak.

Diatur ungkup serak ketiga kali taun tu, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah pechaya festival mega deka nyadi sebengkah festival ke tebilang di Malaysia sereta Asia Tenggara.

Bejaku bejadi edisi ketiga WAK ti deka berengkah September 28 nyentuk ngagai Oktober 27, iya madah festival udah ngerembai enggau manah kenyau diatur ba taun keterubah.

“Ari gaya ke dipeda kitai, WAK nyemaka Festival Edinburgh di Menua Scotland ti tebilang di serata dunya.

“Kitai ngarap festival tu deka majak ngerembai lalu nyadi sebengkah festival ti dikemegah Sarawak, Malaysia enggau Asia Tenggara,” ku iya di siti hotel ditu, kemari.

Festival WAK nyendia mayuh bengkah aktiviti seni, main asal, fesyen, lumba sereta main enggau aktiviti bukai ke diatur ba mayuh bengkah palan ngelingi Mengeri Kuching.

Abdul Karim rambau bejadi Festival WAK di Kuching.

Nengah festival tu, komuniti kreatif ulih ngadu kaul enggau mensia mayuh lalu sama bela ngerami seni, main asal enggau daya idup.

Abdul Karim madah WAK deka nyaup ngenegap ekonomi negeri kelimpah nyadi palan endur raban komuniti kreatif mandangka pengelandik sida.

Bela datai, Menteri Muda Dagang Temuai, Seni enggau Main Asal Datuk Lee Kim Shin sereta Menteri Muda Nembiak enggau Lumba Datuk Snowdan Lawan. — DayakDaily