Entulu,Nyallau nadai dalam rintai nama chalun PRS ke dianjung Masing ngagai KM, PM

Tan Sri Dr James Masing

KUCHING: Sapit Kepala Menteri Sarawak James Jemut Masing, madahka iya udah nganjung rintai nama chalun Parti Rakyat Sarawak’s (PRS) ungkup Pengawa Bepilih Besai Ke14 (PRU14) ngagai kepala menteri enggau menteri besai.

Taja pia, iya madahka diri nadai nganjung nama chalun ungkup sitak parlimen Selangau enggau Lubok Antu laban kededua chalun nya empai dikemendarka ADUN dalam sitak nya.

Penyandang ungkup sitak parlimen Selangau iya nya Joseph Entulu Belaun ke nyadi Sapit presiden PRS sereta menteri ba Opis Menteri Besai lalu William Nyallau Badak penyandang sitak parlimen Lubok Antu.

“Proses kami mudah aja, enti ADUN dalam sitak parlimen nya ngemendarka seduai, kami nadai pilih bukai laban sida endang bisi sukung ari pengundi ba sitak nya,” ku iya madah ngagai pemberita ba Pekit Golf Amatur Masters Tebuka Sarawak Ke10, ba Kelab Golf Sarawak ditu kemari.

Masing, ke mega presiden PRS , empai lama udah mantaika nama chalun PRS dikena napi PRU14, iya nya Joseph Salang Gandum (Julau), Aaron Dagang (Kanowit), Wilson Ugak Kumbong (Hulu Rajang) enggau Masir Kujat (Sri Aman).