MIRI, Ogos 20: Opis Menteri Betanam Betupi Moden, Tanah Adat enggau Pemansang Kandang Menua nyendiaka agih RM2 juta ngagai pekebun dandang besai enggau pekebun di Parlimen Sibuti, Kunsil Negeri (DUN) Lambir, DUN Piasau enggau DUN Marudi ke tuju nanam rian Musang King.
Menteri Opis nya Datuk Amar Douglas Uggah Embas lebuh ti bejadika Mardi Gras Lambir 2018 di Sekolah Kebangsaan Lambir Village madah, keempat-empat sitak nya nerima agih belanja RM500,000 ke tuju nanam rian berindik ari peminta ke tinggi di menua China.
Uggah ke mega Sapit Kepala Menteri madah, perintah deka nentuka pengidup peranak menua pesisir majak manah kelimpah sereta deka munaska penyeranta.
Nengah agih benih Musang King tu, dikearapka pekebun ulih nguna tanah puang sida enggau utai tanam komersil.
Taun nyin tadi, Sarawak udah eksport 16 tan pes rian ke China lalu Uggah pechaya pengawa nanam rian kelebih agi Musang King bisi jalai mujur enti bebendar nanam nya.
Ba renggat perintah besai, Opis Menteri Betanam Betupi enggau Industri Bumai pechaya menua China setuju enggau pinta kitai nyual Musang King ke menua nya ba taun 2019.
Naka ke diau, Musang King semina dieksport ke China baka pulpa beku enggau chelap.
Di Thailand Musang King Malaysia bisi peminta ke tinggi.
Peminta ke tinggi di menua udah ngujungka rega Musang King niki ngagai RM300 sekilogram di Malaysia.
Pansik Opis Betanam Betupi di Malaysia tetemuka urung 500,000 pun rian Musang Raja udah chukup penuai, tebal agi ditanam di Raub enggau Bentong. — DayakDaily
