KUCHING, Nov 9: Bepelasarka gaya ekonomi ti dipeda majak manah dalam ekonomi global diatu, nya dipelaba meri empas ke positif ngagai ekonomi negeri, lalu prospek pengerembai ekonomi ba taun 2018 disadang majak manah manggai ba 4 nyentuk 4.5 peratus.
“Pengerembai nya dipeda mingkur semua industri, ke alai peminta luar lebih tinggi agi sereta disadang ngangkatka dijangka terus ekonomi negeri,” ku Kepala Menteri Datuk Patinggi Abang Johari Tun Openg.
Bekaul prestasi ekonomi negeri, Abang Johari mega madah, ungkup suku keterubah taun tu, ekonomi menua dipeda manah kelimpah pengerembai tegap dalam peminta domestik enghau ari luar ti ditangkanka pengerembai ekonomi dunya.
“Nya alai pemansang ekonomi menua taun tu dipelaba entara 3.5 peratus enggau empat peratus,” ku iya lebuh bejuraika Bejet Negeri 2018 di Dewan Kunsil Negeri ditu kemari.
Ku iya baru, ungkup taun 2018, Perintah Negeri Sarawak merambu melanja RM5.74 bilion, tauka urung 70 peratus ari belanja negeri ungkup pemansang lalu RM2.481 bilion tauka 30 peratus ungkup belanja operasyen.
Iya mega madah, batang strategi bajet enam batang pekara ti diperambu nya sigi ke tuju bulih pemansang ekonomi ke seimbang sereta nyukung tikas pengerembai ekonomi ti dikedeka sereta meri pemerat mgagai ekonomi digital. — DayakDaily
