SARIKEI: Sarawak begunaka kerejasama besaum pemadah enggau semua ngambi ulih ngemujurka ekonomi digital, pia ku Sapit Kepala Menteri Datuk Amar Douglas Uggah Embas.
Ku iya, nitihka pemadah ke diulih lebuh iya nyempulang Kepala Menteri Datuk Patinggi Abang Johari Tun Openg nemuai seraya gawa ke Estonia bedau lama udah, ekonomi digital Sarawak digital enda ulih dikemujur enti semina perintah nengeri ngereja nya kediri aja.
Ku iya, semua penyendia servis meseti bekerejasama ba platform digital ke sama begulai enggau ke bukai dikena nentuka servis nya mujur dikenataika.
“Enti enda ambika chunto, nuan enda ulih mindahka duit ari sebuah bank ngagai bank bukai, mayar bil tauka chukai digital nengah servis telefon,” ku Uggah ti ngarika Kepala Menteri bejadi program National Blue Ocean Strategy My Beautiful Neighbourhood (NBOS MyBN) renggat nengeri, ditu kemari.
Bekaul enggau NBOS ke ditengkebang Menteri Besai Datuk Seri Najib Tun Razak, Uggah madahka nya siti ari chara perintah ngemanahka sistem meri servis ngagai rayat.
