KUCHING, Nov 17: Sapit Kepala Menteri Sarawak, Tan Sri James Masing kemari madahka raban Kristian di Malaysia enda ulih nerima nyema Dewan Bahasa dan Pustaka (DBP) nyalin Bup Kudus ngagai jaku Melayu baka ke dilanggur Majlis Agama Islam Selangor (Mais).
“Sida enda meretika isi ke amat dalam jalai pengarap Kristian, nama kebuah sida deka nulis Bup Kudus ke kitai ?” ku iya madah ngagai pemberita lebuh ke ngenang pasal jaku ti dipansut luyar Mais dalam Kort, Mohamed Haniff Khatri Abdullah ti madahka DBP tau ngeluarka Bup Kudus ti disalin ngagai jaku Melayu ke guna rayat Malaysia.
Ku Masing, pengawa nya mega baka ngeleseka Kristian nyema DBP dikemendar nyalin Bup Kudus ngagai Bahasa Malaysia.
“Mayuh bala pemesai ke bisi doctorate degrees dalam pengarap nya tauka ke bukai, tang nadai penau nyalin Bup Kudus nya ngagai Bahasa Malaysia.
“Ba awak ke sama, aku pan bisi doctorate degree dalam anthropology tang aku mega nadai pematut nulis pasal jalai pengarap bukai” ku rayat Sarawak.
Ku Masing, Mais patut nemu leka jaku ‘Allah’ udah dikena orang Arab jauh lama agi sebedau Islam bisi nyadi jalai pengarap.
“Sapa meri Mais hak semina sida tau ngena leka jaku Allah?” tanya iya.
Ku Masing semina menua Malaysia aja ke bisi penanggul nguna leka jaku “Allah” ba menua ke ukai Islam nyengkaum di Timur Tengah. — DayakDaily
