Oleh Chris Bishop
KOTA SAMARAHAN, Mei 8: Dayak Chair seharitu ngatur licha ‘Iban Diaspora in Tawau, Sabah: Issues of Migration and Identity’ di Fakulti Sains Sosial dan Kemanusiaan (FSSH), Universiti Malaysia Sarawak (Unimas).
Dekan FSSH Professor Madya Neilson Ilan Mersat ba jaku pengelalu program madah licha diatur seraris enggau aspirasyen fakulti ti keran deka ngelaku randau intelektual.
Licha dibantaika Professor Spencer Empading alai iya nerangka asil pansik ke diadu ba sentang pengawa bansa Iban ti ngemeranka main asal ‘bejalai’ ke menua Tawau di Sabah.
Nitihka penerang Spencer, asil ari pengawa bejalai dalam timpuh sebedau enggau pengudah taun 1963 udah ngujungka 2 iti genturung pendiau Iban ditumbuhka di Tawau iya nya di Merotai enggau Kuala Nangsang.
Ku iya ke nyadi Chairholder ungkup Dayak Chair, tebal agi sida ke mindah ngagai menua Tawau nya bansa Iban ari pelilih Kapit enggau Song.
“Sebedau taun 1963, pemindah raban tu mansa Sandakan, Lahad Datu, Tawau lalu sangkai di Kalabakan alai diak sida numbuhka Kampung Iban Merotai Besar.
“Pemindah sekeda raban bukai ke nyadi pengudah taun 1963 ngujungka siti genturung pendiau ke dikelala nengah nama Kampung Iban Nansang ditumbuh,” ku Spencer.
Nyentukka diatu ku iya nambah, kededua genturung pendiau nya mengkang diwan bansa Iban, ngemeranka daya idup enggau jaku Iban.
Diatu, Kampung Iban Merotai Besar diwan 160 ruang bilik bansa Iban iya nya urung 1,110 iku.
Naka ke bulan Jun 2012, Kampung Iban Nansang diwan 64 ruang bilik iya nya urung 425 iku.
Spencer nambah, bansa Iban di kededua genturung pendiau tu begulai manah enggau Perintah Sabah sereta bansa bukai alai sida mega bisi diberi Sabah Land Development Board(SLDB) tanah.
Tebal agi sida ku Spenser ngulihka penatai pemisi asil ari pengawa bekebun sawit.
Dayak Chair ditumbuhka ba taun 1998 bepelasarka pemerat sereta penuduk unik bansa Dayak di Sarawak enggau Kalimantan.
Gempung tu udah ngadu mayuh pansik kelebih agi ba isu ke balat meri pemar ba bansa Dayak.
Berengkah ari pun taun 2019, Dayak Chair ti udah ngeluarka sekeda bup enggau journal diperabung FSSH. — DayakDaily
