Dikarang Chris Bishop
KUCHING, 16 Ogos: Kluster Jeti Kuching ditutup sereta nadai kes positif baru covid-19 dirikud seharitu.
Komiti Pengintu Penusah Ngenyit Negeri Sarawak (JPBNS) nengah surat penerang berita madah, penyampau semua kes positif Covid-19 mengkang 682.
JPBNS mega madah Kluster Jeti Kuching keterubah ditemu kena 9 Julai 2020 ba siti palan penyangkai kapal berikan di Pending ditu.
“Bisi 2 kes positif Covid-19 dirikud ari kluster tu alai kededua nya udah gerai sereta dikemendar pansut ari spital.
“Kes mungkur 2 iku peranak menua luar ti gawa ba siti kompeni berikan di Pending, Kuching. Kes keterubah iya nya kes ke-584 ditemu pengudah iya dianjung beperesa Covid-19 ba siti spital pribit di Kuching kena 9 Julai.
“Iya ditemu positif Covid-19 ba hari ke sama alai berindik ari nya, kes kedua iya nya kes ke-603 ke nyadi kaling kes keterubah bela ditemu pengudah diperesa,” ku JPBNS.
Nitihka penerang nya mega, kededua kes diperubat di Spital Besai Sarawak(SGH) lalu gerai sereta dikemendar pansut kena 30 Julai 2020.
JPBNS mega madah, bisi 7 kluster Covid-19 mengkang aktif di Sarawak naka ke diatu lalu nya mungkur 62 kes.
“Kluster ti mengkang aktif di Sarawak iya nya Kluster Syarikat Kejuruteraaan (8 kes), Kluster Mambong (7 kes), Kluster Pasar Stutong
(7 kes), dan Kluster Sentosa (31 kes).
“Kluster bukai iya nya, Kluster PUI Melbourne (3 kes), Kluster Syarikat Pembinaan Kuching (2 kes) enggau Kluster Pasar Satok (4
kes),” ku JPBNS.
Nadai kes bisi dirikud gerai seharitu alai penyampau kes positif Covid-19 ti udah gerai sereta dikemendar pansut ari spital manggai 659 iku tauka 96.33 peratus ari penyampau semua kes.
“Bisi 4 iku mengkang diperubat ba wad isolasyen spital alai penyampau kes mati mengkang 19 iku,” ku JPBNS. — DayakDaily
