Dikarang Chris Bishop
KUCHING, 18 Ogos: Sarawak seharitu nadai ngerikud kes positif baru Covid-19, ku Chairman Komiti Pengintu Penusah Ngenyit Negeri Sarawak (JPBNS) Datuk Amar Douglas Uggah.
Enggau nya ku iya, penyampau semua kes positif Covid-19 di negeri tu mengkang 682.
Uggah mega madah diak seharitu bisi 1 kes udah gerai sereta dikemendar pansut ari Spital Besai Kuching (SGH).
“Penyampau semua ke udah gerai sereta dikemendar pansut ari spital manggai 660 iku tauka 96.77 peratus ari penyampau semua kes.
“Tiga iku mengkang diperubat ba wad isolasyen alai penyampau kes mati mengkang 19 iku.
“Seharitu bisi 22 kes baru PUI diriput lalu siku benung nganti pemutus peresa makmal,” ku Uggah ba aum pengarang berita ditu, seharitu.
Iya mega madah bisi 7 kluster mengkang aktif di Sarawak iya nya Kluster Syarikat Kejuruteraaan (8 kes), Kluster Mambong (7 kes), Kluster Pasar Stutong (7 kes), Kluster Sentosa (31 kes), Kluster PUI Melbourne (3 kes), Kluster Syarikat Pembinaan Kuching (2 kes) enggau Kluster Pasar Satok (4 kes).
Ngenang kaul ke sama, Uggah madah semua peranak Sarawak ke pulai ari menua luar meseti dikuarantin pengelama 14 hari.
Dalam timpuh nya ku iya, sida deka diperesa 2 kali iya nya ba hari ke-2 enggau hari ke-10.
“Ungkus endur kuarantin deka dibayar Perintah Sarawak.
“Ungkup peranak luar (Semenanjung, Sabah, Labuan enggau menua bukai) ke pulai ari menua luar tama ke Sarawak, sida dipinta mayar kediri empu ungkus kuarantin enggau ungkus peresa Covid-19,” ku Uggah. — DayakDaily
