Covid-19: Kluster Kidurong nambah 2, bini enggau anak dirampit

A stethoscope. - DayakDaily.com file pic. // Photo: Pixabay

Oleh Chris Bishop

KUCHING, Jun 21: Penyampau kes Kluster Kidurong bekaul enggau Covid-19 seharitu nambah ngagai 8 kes pengudah 2 iku agi ditemu positif.

Sekretariat Komiti Pengintu Penusah Ngenyit Negeri Sarawak (JPBNS) nengah surat penerang madah kededua kes (kes ke-567 enggau 568) ngarika raban sebilik sereta orang ke besemak enggau kes ke-566 iya nya bini enggau anak kes nya.

JPBNS mega ngeriput diak seharitu bisi 3 kes baru positif Covid-19 (nyengkaum kes ke-567 enggau 568) alai semua kes nya ditemu di Bintulu.

“Kes ke-569 iya nya siku lelaki berumur 29 tahun ke bisi sejarah gawa di Mexico kenyau bulan Februari 2020. Kena 9 Jun 2020, kes bisi pulai ke Malaysia nengah penerbai bilun ari Mexico ke Jepun lalu sangkai di Malaysia kena 10 Jun 2020.

“Peresa RTK antigen ke diambi di KLIA mandangka asil negatif lalu kes dikuarantin di hotel. Kena 14 Jun 2020, iya sangkai di Bintulu lalu dianjung ngagai hotel endur iya nyambung kuarantin.

“Chunto diambi kena 20 Jun 2020 lalu ditemu positif nengah peresa rtPCR,” ku JPBNS.

Enggau 3 kes baru nya, JPBNS netapka penyampau kes positif Covid-19 di Sarawak manggai 569 kes.

Surat penerang nya mega madah diak seharitu nadai kes positif Covid-19 ke udah suman sereta dikemendar pansut ari wad.

Berindik enggau nya, penyampau kes positif Covid-19 ke udah suman sereta dikemendar pansut ari wad mengkang 535 iku tauka 94.02 peratus ari penyampau semua kes.

“Penyampau 17 iku mengkang diperubat di wad isolasyen spital. Penyampau pemati mengkang 17 iku alai 18 PUI baru bisi diriput lalu 4 kes benung nganti asil peresa makmal,” ku JPBNS. — DayakDaily