Covid-19: 5 hari bejurut nadai kes positif di Sarawak

Image by fernando zhiminaicela from Pixabay

KUCHING, 5 Ogos: Sarawak seharitu sekali agi nadai ngerikud kes positif baru Covid-19, lima hari bejurut kenyau 1 Ogos.

Komiti Pengintu Penusah Ngenyit Negeri Sarawak (JPBNS) nengah siti penerang berita seharitu madah, penyampau kes naka ke diatu mengkang 678.

JPBNS mega madah, naka ke diatu bisi 10 kluster Covid-19 ti mengkang aktif di Sarawak.

“Kluster ti mengkang aktif di Sarawak iya nya Kluster Syarikat Kejuruteraaan (8 kes), Kluster Mambong ( 7 kes), Kluster Pusat Perubatan (3 kes), Kluster Jupiter (3 kes), Kluster Pasar Stutong (7 kes), Kluster Jeti Kuching (2 kes).

“Kluster bukai iya nya Kluster Sentosa (31 kes), Kluster PUI Melbourne (2 kes), Kluster Syarikat Pembinaan Kuching (2 kes) enggau Kluster Pasar Satok (4 kes),” ku JPBNS.


Ngenang kaul ke sama, surat penerang nya madah seharitu bisi 10 kes baru ke udah gerai lalu dikemendar pansut ari spital iya nya 9 ari Spital Besai Sarawak (SGH) sereta siku ari Spital Bintulu.

Enggai nya, penyampau kes positif Covid-19 ti udah gerai sereta dikemendar pansut ari spital manggai 617 iku tauka 91 peratus ari penyampau semua kes.

Bisi 42 iku mengkang diperubat ba wad isolasyen spital alai penyampau kes mati mengkang 19 iku. — DayakDaily