Cek bantu UNIFOR mandangka Perintah Negeri GPS meratka tetiap bansa enggau ugama

Snowdan (empat ari kiba) nyuaka cek bantu UNIFOR ngagai siku penerima di Pantu kena Hari Minggu tu tadi.

KUCHING, 15 SEPTEMBER: ADUN Balai Ringin Datuk Snowdan Lawan kena Hari Minggu tu tadi bisi nyuaka cek bantu ari Unit Pekara Ugama Bukai(UNIFOR) ngagai 3 buah gerija di kandang endur Pantu.

Ba pengawa nya, Gerija SDA Simpang Pantu nerima RM300,000 lalu Gerija Baptist Lachau nerima RM100,000 ngambi tau dikena ngaga baru gerija.

Gerija Baptist Pantu nerima RM20,000 ungkup pengawa ngemanah gerija.

“Nengah cek bantu tu, mandangka Perintah Sarawak ti dikuasa Gabungan Parti Sarawak(GPS) meratka tetiap peranak negeri enda ngira bangsa enggau ugama,”ku Snowdan.

Dulu agi ari nya, Snowdan ke mega Menteri Muda Nembiak enggau Lumba ngulu program Randau GPS begulai enggau raban ketuai bansa sereta komunti di Kampung Limau Pantu.


Ba randau nya, Snowdan ngelalau rayat Sarawak ngambika ngundi GPS ba Pengawa Bepilih Negeri Ke-12(PRN12).

Ku iya, GPS nyata ulih ngatur mayuh program dikena ngemansang kandang menua pesisir.

‘Opis Betanam Betupi bisi ngatur mayuh program bantu ngagai orang bekebun sawit, getah, rian musang king sereta padi ke disengkaum dalam kadang endur ke dikumbai ‘food basket’ baka ke ba Abok, Limau, Dadak enggau Sg Tenggang.

“Program tu diatur ngambika Sarawak ulih ngurangka impot ba pekara pemakai lalu nyadi ngeri nyual pemakai.

“Ketegal nya, orang bekebun diperansang nanam produk ke ngembuan makit ke besai baka musang king ke dijual ke menua China,” ku Snowdan.

Kelimpah ari nya tambah iya, program mega mantu nambah penatai pemisi ruang bilik manggai RM4,000 sebulan.

Ku Snowdan, GPS deka terus nyendia perengka guna baka ke jalai alun, bekal ai enggau lektrik ngambika pengidup rayat majak lantang.

“Bida entara kitai(GPS) enggau penyakal iya nya kitai keran deka mai pemansang tang sida penyakal semina berunding deka ngasut runding rayat.

“Penyakal kelalu mayuh besemaya tang enda kala nyadi nyata,” ku iya.

Berindik enggau nya, Snowdan ngelalau rayat ngambika bepikir enggau betul maya ngundi ba PRN12.

“Enti salah pilih, kitai deka nganti lima taun agi. GPS sigi pilih ke ngena ketegal ti ngembuan rikud ti manah,” ku iya.

Snowdan nambah, bedau lama tu tadi Perintah Negeri udah ngemendar 47 kouta ketuai bansa ke baru ungkup DUN Balai Ringin.

Bela datai ngulu randau Sekretari Politik Kepala Menteri Datuk Seri Doris Brodie, Pemancha Mooney, Pengulu Johny Lumi enggau Pengulu Pelie Jumbu. — DayakDaily