KUCHING: Sekretari Besai BN Sarawak, Dato Sri Dr Stephen Rundi pechaya Barisan Nasional (BN) Sarawak ambis nadai ulih ngerampas pulai empat kerusi ari penyakal ba Pengawa Bepilih Besai Ke-14 (PRU14).
Dr Rundi lebuh ke bejaku ngagai pemberita madah, iya mega meransang semua parti komponen BN besaup sereta bebendar agi gawa ngerampas pulai empat kerusi nya.
Ku iya, kitai udah menang ba 25 kerusi lalu alah ba enam kerusi ba pengawa bepilih besai ke sebedau tu. Tang ba PRU14, kitai pechaya ulih menang ba ambis nadai empat kerusi (ari enam kerusi).
Kitai deka bebendar agi meri sukung ngagai parti komponen BN ti ngarika empat kerusi nya, ku iya.
“Aku meri jaku tangkan sebarang penyerekang penemu ti nyadi entara SUPP enggau UPP meseti diputar sebedau PRU14 dikena nentuka bulih pemujur ngerampas pulai empat kerusi nya,” ku iya.
Taja pia, strategi ke dikena ngerampas pulai empat kerusi nya enda tau dibantai, ku iya ke mega menteri utiliti.
Ba PRU13 suba, BN Sarawak udah menang ba 25 kerusi lalu alah ba enam kerusi nyengkaum Bandar Kuching, Stampin, Sarikei, Lanang, Sibu enggau Miri.
