Bisi 103 nembiak dirami ba Pengerami Graduetsyen MRSM Betong Ke-8

Graduation. — DayakDaily.com file pic. // Photo: Pixabay

BETONG: Bisi 103 nembiak Tingkatan Lima dirami ba Pengerami Graduetsyen enggau Anugerah Ke-8 Maktab Rendah Sains Mara (MRSM) Betong ditu ensanus.

Sama bisi nerima gelar pengaga ati iya nya 29 iku chalun Sijil Pelajaran Malaysia (SPM) ke udah bulih pemutus ke pemadu manah ba SPM 2016.

Gelar bukai ti sama bisi disua iya nya subjek ti bulih gred ke majak manah ba SPM 2016 iya nya subjek Bahasa Inggeris, biologi enggau pengurusan akaun.

Bela bisi disua iya nya Gelar ungkup subjek 10 teratas ranking GPS MRSM Se Malaysia 2016 ungkup subjek biologi ke ba tangga ke-4 ari 48 MRSM enggau gelar ungkup ‘penghargaan khas komuniti setempat’.

Residen Bagi Menua Betong Friday Belik ti ngarika Sapit Kepala Menteri, Datuk Amar Douglas Uggah Embas ke mega Menteri Betanam Betupi Moden, Tanah Adat enggau Pemansang Kandang Sarawak udah bejadi pengerami nya ba Dewan Gemilang MRSM Betong.


Dalam teks jaku Uggah ke dibacha Friday, iya madahka diri temegah ati meda pemujur ke udah dijapai MRSM Betong kenyau dibuka ba bulan November 2008.

Ku Uggah, MRSM udah mujur muka awak ngagai peranak menua pesisir bulih perengka guna pelajar ke manah sereta bekualiti dikena nyendia modal insan ke nyulut ti ulih ngerembaika pemansang menua.

Ku iya, pemesai reti nyadi orang dagang beguna amat diterenak ba bala nembiak ngambika ulih dikena ngemansangka sesiku individu ngambika nembiak rebak baru sedia napi pemar jemah ila setipak enggau transformasyen perintah.

MRSM platform ke beguna amat endur nyendiaka pengereja pengawa landik ti ulih ulih ngereja pengawa ke diberi sereta dikena napi pemar Transformasyen Nasional 2050 (TN50),” ku iya.