KUCHING, Nov 13: Sapit Kepala Menteri Datuk Amar Awang Tengah Ali Hasan minta Perintah Besai Pakatan Harapan (PH) terus nyendia agih belanja dikena nampung kereja nyukat kelingi tanah NCR.
Ku iya ke mega Menteri Pemansang Kandang Mengeri enggau Pengeraja Asal, agih belanja nya ulih nentuka kereja nyukat kelingi dikelengkas.
“Sebedau tu, Perintah Besai seruran meratka kereja nyukat kelingi tanah NCR tajapan sida nemu pekara nya nyadi tanggupengawa negeri.
“Tajapia, ba Bajet Menua 2019 ke dibantai bedau lama tu tadi, enda dipadah enggau terang sentang agih belanja ungkup program tu.
“Kitai enda nemu sekalika Perintah Besai deka terus meri agih belanja,” ku iya.
Awang Tengah mansutka jaku nya ba Aum Dewan Undangan Negeri (DUN) Ke-18 di Komplek DUN seharitu.
Enti nadai agih belanja diberi Perintah Besai, Awang Tengah pechaya Kepala Menteri deka nyendia belanja ketegal program nya sigi diguna rayat kelebih agi komuniti bumiputera.
Iya madah Perintah Negeri sigi ngakun hak rayat ba tanah sida alai program nyukat kelingi berengkah diadu ba taun 1960 nengah program ‘Operasi Penyelesaian’.
Kelimpah ari nya, Awang Tengah madah Program Nyukat Genturung Pendiau Tradisyenal udah berengkah ba taun 2000.
“Kenyau digaga ba bukan Oktober 2010, penyampau RM161 juta udah dipelanja alai ungkup Atur Pemansang Malaysia Lumpar Ke-11, penyampau RM90 juta udah dikemendar.
Ungkup renggat keterubah kereja nyukat kelingi dikena meri gizit tanah nyadi Rizab Komunal Bumiputera (betanam betupi) nengah Seksyen 6 Kanun Tanah Negeri, iya madah 870,265 hektar udah disukat naka bulan Oktober 2018.
Ari penyampau nya, 687,258 hektar udah digizit di serata Sarawak, tandu iya ke mega Menteri Pemansang Industri enggau Orang Dagang.
Ngenang kaul ke sama, Awang Tengah madah renggat kedua program, kandang endur ke udah disukat nengah Seksyen 6 deka disukat lot ‘individu’.
“Naka ke diatu, 22,983 lot ‘individu’ udah mujur disukat lalu mungkur pemesai 28,807 hektar.
“Tanah tu deka dikeluar surat pala tanah nengah Seksyen 18 Kanun Tanah Negeri,” ku Awang Tengah. — DayakDaily
