LAWAS, April 13: Sapit Kepala Menteri Sarawak, Datuk Amar Awang Tengah Ali Hasan, arap endar kerusi Barisan Nasional (BN) Lawas enggau Limbang agi diempu BN ba pengawa bepilih besai ke-14 (PRU14) tu ila.
Sapit Presiden PBB nya madah, bepelasarka pemutus pengawa bepilih kunsil nengeri ba taun 2016, kededua kerusi nya sigi kuta kuat BN.
“Ba pengawa bepilih nya, dua kerusi DUN iya nya Bukit Sari ari baruh Parlimen Lawas enggau Bukit Kota ari baruh Parlimen Limbang udah menang darat,” ku iya lebuh ngelanchar raban pengawa bepilih Parlimen Lawas, ditu kemari.
Ku iya, nya ngelaika pengering BN ba kededua sitak nya nyentuk ke penyakal enggai bediri minta pilih ba PRN ke udah.
Sitak Lawas enggau Limbang sama diempu PBB.
Sitak Lawas disandang Sapit Menteri Dagang Dalam Nengeri, Koperasi enggau Pekara Bebeli Barang, Datuk Henry Sum Agong, 72, ti ngarika sitak nya kenyau ari taun 1999 lalu Limbang diarika Hasbi Habibollah, 55, kenyau ari taun 2008.
Ngenang pasal PRU14, Awang Tengah madahka komitmen perintah BN dipandang nengah perambu deka ngaga padang bilun Lawas dalam manifesto BN ti dibantai kena April 7 tu tadi.
Ku iya, manifesto nya mandangka komitmen perintah besai deka ngemansangka Sabah enggau Sarawak ngambika sebaka enggau Semenanjung.
Ku iya, penyiru Najib mega dikelaika nengah penemuai 60 kali iya ti ngaul 160 program di serata Sarawak sekumbang 9 taun nyadi menteri besai.
Ku iya baru, projek Pan Borneo diatu benung digaga ari Kuching ke Miri ti mega bisi mungkur jalai alun di Limbang enggau Lawas. — DayakDaily
