Dikarang Chris Bishop
KUCHING, 21 Sept: Datuk Sarjan (B) Awang Raweng baka anak lelaki ke maing muting geraji tajam gerenyam nyemilu tisi.
Ku Sapit Kepala Menteri Datuk Amar Douglas Uggah, Awang bujang tebilang berani mati alai lebuh betempuh enggau munsuh setempap enda rarat lalu seinchi sigi enda rari.
“Nuan (Awang) ngagai juluk ati ngepung mimpi, diberi Raja tanda pemerani dikelala orang serata dunya seluruh negeri.
“Ngaduka pengelikun menua awakka bisi diibun kami ke dudi,” ku Uggah ba pengawa meri basa sereta besembiangka Niang Awang Raweng ke diatur di Dewan Suarah Kuching seharitu.
Awang, 91, penerima Midul George Cross midang kena 18 September di rumah anak iya di Taman Padri di Sri Aman.
Niang siku jelan tubuh bebansa Iban ke ulih nerima midul George Cross ari Queen Elizebeth II ketegal ti udah mandangka pemerani tikas tinggi lebuh meri servis ba Soldadu British menya.
Tambah Uggah, Awang maya berambunka nyawa ngetanka menua sigi enda kala dudi tang suah dulu.
Pemerani niang ke asal ari Nanga Skrang nya ku Uggah sigi genap enda ulih ditelah ditiu enggau jaku.
Lebuhka macha eulogi, Uggah madah Awang siku penyidi Iban ti datai ke Malaya ba taun 1950-an alai iya dipasuk dalam Rejimen Worcestershire enggau Sherwood.
Ba siti operasyen di Kluang, Johor kena 27 Mei 1951, platoon sida diserang ngenyit lebih 50 iku munsuh komunis.
“Ba maya nya, niang ke bisi bakal ditimbak tetap betachah ngelaban 50 iku munsuh komunis kediri ketegal ti deka ngidupka siku soldadu British Private Griff Hughes ti bakal,” ku Uggah.
Awang badu ari Sarawak Rangers ba taun 1960 iya nya ba pengujung jeman Darurat Malaysia tang dipasukka baru ba taun 1963 mantu maya jeman konfrontasi Indonesia.
Pengudah pinchin, niang pulai ngagai menua diri di Skrang alai iya nyadi tuai rumah nyentukka taun 2018.
“Awang siku ari raban elit ‘Iban Trackers’ ti meri servis ba jeman Darurat Malaysia ari taun 1948 nyentukka 1960.
“Kitai rayat Malaysia berasai temegah alai iya idup nengah semengat Agi Idup Agi Ngelaban.
“Sigi enda ulih disangkal agi, Awang ‘hero’ ba semua pekara,” ku Uggah.
Bela datai ngulu pengawa numbak niang di Pendam Pahlawan iya nya “New Defence Advisor of the British High Commission, Group Captain Simon Hindmarsh ti ngarika Ratu Elizabeth II. — DayakDaily
