KUCHING, Julai 29: Sebuah gerempung ukai dikuasa perintah (NGO) nyukung perambu Perintah Sarawak ke deka nyali RM1 bilion ngagai perintah besai ngambika bisi dikena ngaga sekula repuk di negeri tu.
Direktor Amal Relief Malaysia (ARM) Sarawak, Andri Zulkarnaen Hamden madah nya berindik ari Sarawak negeri ke ngerikud peratus ke pemadu tinggi sekula ti dikategori ngembuan sekula repuk, lalu pemutus negeri nya ulih mantu mutarka penanggul nya.
“Aku deka ngenataika langgur penemu ngagai Menteri Pelajar Malaysia, Dr Maszlee Malik ngambika nerima pemeri perintah negeri ke digaga nengah Kepala Menteri Datuk Patinggi Abang Johari Tun Openg ti sedia deka nyali RM1 bilion dikena ngemanahka sekula repuk di negeri Sarawak.
“Penanggul tu enda patut diteju lama sereta enda diputarka pia aja bekebuahka nadai ungkup belanja. Penanggul tu ke nyadi kenyau ari suba mengkang enda ulih diputar sereta udah ngasaka peranak di negeri tu,” ku iya kemari.
Abang Johari lebuh ke bejadi Pengerami Hari Pengajar Renggat Sarawak ke-47 di Betong, kena Hari Tiga minggu nyin tadi, bisi nyebut madahka perintah negeri deka nyali perintah RM1billion ngagai perintah besai ngambika bisi dikena ngemanah sekula repuk di Sarawak.
Andri Zulkarnean madah, sektor pelajar nya tanggungpengawa perintah besai lalu penanggul pelajar ukai pekara ti tau dikaul enggau politik. — DayakDaily
