KUCHING, Nov 13: Pengari Rayat (YB) ari kededua piak, perintah enggau penyakal dipinta berakup nyapai siti tuju, iya nya negika hak Sarawak ba Federasyen Malaysia.
Pinta tu dikenatai Sapit Kepala Menteri Datuk Amar Awang Tengah Ali Hasan alai hak Sarawak ba mayuh bengkah pekara udah disetuju nengah Sempekat Malaysia 1963 (MA63).
“Aku ngarap raban ‘Ahli-Ahli Yang Berhormat’ ari kededua piak berakup, alai kitai Anak Sarawak meseti ngenanka hak ba Federasyen Malaysia enggau MA63, nyengkaum otonomi ba pekara wang.
“Kitai meseti bediri tegap, negika hak Sarawak, nadai lebih nadai kurang,” ku iya rambau Aum Dewan Undangan Negeri(DUN) di Komplek DUN seharitu.
Awang Tengah ke nyadi Menteri Pemansang Industri enggau Orang Dagang nambah Perintah Sarawak keran deka ngaga mayuh agi jalai alun enggau jematan ngambi ulih nyendia penyambung kandang menua pesisir ngagai kandang mengeri.
Pengawa nya ku iya deka muka mayuh agi kandang endur baru lalu dikemansang.
“Kitai deka nyendia bekal lektrik enggau ai ngagai rumah di menua pesisir.
“Kitai deka ngemanah sekula repuk di negeri tu ngambika bala anak (di menua pesisir) ulih belajar enggau likun sereta lantang. Kitai mega deka ngaga mayuh agi rumah ulih beli ungkup raban B40,”ku iya.
Berindik enggau nya, Awang Tengah muji Bajet Negeri 2019 ke udah dibantai Kepala Menteri dulu agi ari tu.
Ku iya, bajet 2019 nyadi siti sejarah alai pengawa pemansang di menua pesisir dikemerat lalu disadang ulih ngurangka bida pemansang enggau kandang mengeri.
Kelimpah ari nya, Awang Tengah netapka Sarawak deka nampung agenda ngemansang pengawa industri.
“Mayuh agi puku ari menua luar deka diperanak ditu. Kitai deka nyendia perengka guna ungkup industri lalu meri sukung ba pengerembai pengawa gudang.
“Kitai dekaka Orang Dagang Mit enggau Jelan Pemesai kitai mujur ba pengawa sida,” ku iya.
Iya nambah mayuh tanggungpengawa tu dipegai Perintah Besai.
Tang nengah bajet negeri, sekeda projek perintah besai ti udah ditangguh tauka dikinsil, kelebih agi ke patut digaga enggau lengkas ulih dikemujur, tandu Awang Tengah. — DayakDaily
