Ambi peluang beperesa pengerai nengah ‘Skim Peduli Kesihatan’: Dr Jamilah

Jamilah ba Program Skim Peduli Pengerai di Klinik Petra Jaya.

KUCHING, OGOS 17: Direktor Opis Pengerai Negeri Dr Jamilah Hashim nesau raban B40 beambi ulih ari ‘Skim Peduli Kesihatan’ ke disedia perintah.

Ku iya, kenyau skim nya dipungkal semina 13 peratus ari penyampau 85,000 raban B40 di Sarawak udah beperesa pengerai ba klinik ke dipilih.

“Nengah skim tu, raban B40 bulih empat bengkah pemaik kelimpah ti nyeliah sida mayar kus berubat ke tinggi.

“Sida ulih beperesa pengerai tubuh, diberi ubat sereta insentif ba kus perengka pengangkut,’ku iya.

Jamilah mansutka jaku nya ba Program Skim Peduli Pengerai Ungkup Raban B40 ba Klinik Petra Jaya pagi tadi.

Kelimpah ari klinik perintah ku iya nambah, raban B40 tau mega ngulihka servis tu ba klinik pribit ke udah dipilih opis pengerai.

Iya madah, raban B40 tu mungkur sida ti bulih ‘Bantuan Sara Hidup’(BSH) sereta sida ke beumur 50 taun ke atas.

“Skim tu sebengkah insentif perintah nengah Opis menteri pengerai dikena nyendia servis pengerai ungkup raban ke kurang penatai pemisi sereta meri fokus ngagai penyakit enda bejangkit.

“Anang masau peluang tu ketegal peresa pengerai tu enda bebayar lalu perintah udah ngagihka RM100 juta ngagai kita ti ba B40,’ku iya.

Tambah Jamilah, pansik ke udah digaga opis pengerai ngayanka sakit darah tinggi, kemi manis enggau tungkul ati suah agi nuntung raban B40.

“Asil pansik nya madah enti bisi 100 iku orang ti sakit, 36 iku ari sida ngarika raban B40.

“Baka nya mega penyakit riman alai 60 peratus sida ti napi penyakit nya ketegal ti laun beperesa ba klinik,’ku iya.— DayakDaily