Ali, Subeng ngembuan peluang 50-50 menang ba Parlimen Saratok

Choice. — DayakDaily.com file pic. //Photo: Pixabay

SARATOK, Mei 6: Chalun BN-PDP Subeng Mula enggau chalun PH-PKR Ali Biju dipeda majak chakah bekimpin sereta nguna strategi ke pemadu engkeman ngambika ulih ngambi ati pengundi.

Ari perati enggau respons ari mensia mayuh, seduai dipeda sama bisi peluang 50-50 menang.

Kelimpah karakter, chara chalun ngambi ati mega diperati pengundi ti ulih mantu kededua chalun nya ngambika ulih menang.

Ali dipeda ninting hari bejalai betemu enggau peranak dalam sitak ke endur iya minta pilih. Kandang endur ke suah alai Ali bekimpin iya nya kubu kuat BN, N. 40 Kabong. Ali nemu undi ari Kabong ulih mantu iya ngalahka Subeng maya PRU 14 tu ba kerusi P. 205 Saratok.

Baka nya mega, Subeng ari Barisan Nasional (BN), nguna chara diri empu nengah bantu ari pengari rayat sitak DUN nya.

Taja pia, nadai ulah ti enda manah bisi nyadi dikereja kededua penyukung chalun nya.

Nambahka nya, penyukung seduai sama agi ulih betabi lalu duduk betunga mua ngirup ba kedai kopi ti mandangka penuai runding sida ba politik.

Gaya ti dipandang penyukung kededua chalun nya ngasuh seduai sama ngelu pala melabaka gaya sukung pengundi nyerumba hari muai undi kena Mei 9 tu. — DayakDaily