KUCHING, Mac 12: Kepala Menteri Datuk Patinggi Abang Johari Tun Openg udah sedia mantaika jalai endur ngaga Sistem Transit Aliran Ringan (LRT) dikena ngemujurka perambu ngaga sistem nya ujung Mac tu.
“Aku deka ngaga nya lalu LRT nya ila tentu deka ngerembaika pemansang di negeri kitai,” ku Abang Johari bejaku ba Pengerami Bejadi 3 Dalam 1 Pampang Indu Parti Pesaka Bumiputera Bersatu (PBB) di Kuching kemari.
Ku Abang Johari, pengawa ngaga LRT begunaka prambu silik nyengkaum ngelala jalai enggau belanja ke diinjau ari Bank Pemansang Sarawak (DBOS).
Bungkur LRT nya deka berengkah ari Kuching dulu lalu iya melabaka generasi PBB ila ulih majak nyambung nya ngelui Sibu ke Miri.
Abang Johari mega meransang kaban PBB fokus ngagai Pengawa Bepilih Besai Ke-14 (PRU14) ke deka diatur enda lama agi lalu PBB deka menang magang ba semua kerusi ti endur bediri minta pilih. — DayakDaily
