Abang Johari: Pemeri ungkup raban indai dibantai maya Bajet 2020, ujung 2019

Datuk Patinggi Abang Johari Tun Openg

Dikarang Chris Bishop

KUCHING, Mei 12: Pemeri ungkup raban indai ti ngadaka anak deka dibantai maya Bajet Negeri 2020 iya nya ba ujung taun 2019.

Bejaku ngagai pemberita seharitu, Kepala Menteri Datuk Patinggi Abang Johari Tun Openg madah mayuh implikasyen deka dulu diperunding sebedau nentuka bengkah pemeri nya.

“Bedau diatu. Aku deka mantaika pemeri nya dudi ila. Ke amat, mayuh implikasyen ba sukut belanja ba sentang pekara tu.

“Aku deka mantaika pemeri tu maya mantaika Bajet Negeri 2020, ujung taun tu,” ku iya.

Dulu agi ari nya Abang Johari bejadi pengawa ngelanchar ‘Produk Warisan Kampung’ di Pasaraya Mydin ditu.

Pemeri nya diberi ngagai raban orang indu ti bisi ngadaka anak enggau tuju ngelempung tating belanja ruang bilik sida.

Ba pengerami ngelanchar aplikasyen Sarawak Pay di KK Super Mart, di Kota Sentosa, Abang Johari madah pengudah beranak, raban orang indu meseti dipantau kelebih agi ba sentang pengawa meri tusu eksklusif ngagai anak ke baru ada nyentuk ngagai 6 bulan.

Dulu agi ari tu, Perintah Negeri madah deka meri Endowment Fund Sarawak (EFS) penyampau RM1,000 ngagai semua anak mit ke ada ba taun 2019. — DayakDaily