BATANG LUPAR, Dis 19: Kepala Menteri, Datuk Patinggi Abang Johari Tun Openg bedanji deka majak negika peranak menua pesisir baka ti udah dikereja niang Tun Adenan Satem ke sebedau tu.
Ku iya, komitmen nya nyata dipeda nengah ungkup belanja 70 peratus ari Bajet Sarawak taun baru berat agi ke pemansang, ke alai sebagi besai ari nya ungkup menua pesisir.
Ba awak ke sama, iya mega majak randau nurunka kuasa ari perintah besai ngagai perintah negeri, ke sebedau tu udah dipunka niang Tok Nan.
“Kami komited negika semua hak Sarawak ti majak punas. Diatu ari baruh pegai aku, kitai udah masuk ngagai renggat kedua, bekaul enggau undang-undang.
“Pansik kitai di London mandangka dalam siti fail kediri semina ulih dikerebak pengudah 50 taun, perintah koloni British bisi ngungkupka Akta Ngelumbung ti meri kuasa ngulihka petroleum engga gis ngagai kitai iya nya 12 batu nautika ari pantai,” ku iya lebuh bejaku maya bejadi Jematan Rimbas, Pusa ditu empai lama.
Ba pengerami nya sama bisi datai Menteri Kereja Raya, Datuk Seri Fadillah Yusof; Menteri Pemansang Orang Indu, Ruang Bilik enggau Raban Bansa ke mega Kaban Parlimen Batang Lupar, Datuk Seri Rohani Abdul Karim sereta Sapit Kepala Menteri, Datuk Amar Douglas Uggah Embas.
Ba pengerami nya, Jematan Rimbas udah diberi nama baru iya nya Jematan Tandang Sari.
Projek ngaga Jematan Tandang Sari semanjai 327 meter nya beungkus RM46.98 juta tembu endar digaga kena 15 Mei tu tadi. Jematan nya deka ngemandakka pejalai ari Pusa lama ke Betong ti sepenyauh 10 kilometer tauka 10 minit, lalu ari Pusa lama ke Sarikei sepenyauh 30 kilometer tauka 30 minit. — DayakDaily
