Dikarang Chris Bishop
KUCHING, 29 SEPTEMBER: Kepala Menteri Datuk Patinggi Abang Johari Tun Openg deka meresa seraya ke nguji jalai Sibu ke Kapit hujung minggu tu.
Bejaku ba pengawa begelumu begulai enggau komuniti di Lawas malam tadi, Abang Johari madah iya deka nguji jalai nya ngena mutusikal.
“Aku dipadah pejalai ari Sibu ke Kapit ngambi timpuh sejam setengah.
“Diatu udah bisi jalai, reti nya kitai enda ngena ekpress(bot) agi.
“Enggau nya, aku deka nguji jalai Sibu ke Kapit ba minggu baru tu,”ku iya.
Ngenang kaul ke sama, iya mega madah Jambatan Sungai Mujung udah tembu digaga lalu nyambung Kapit ngagai Baleh.
Ku Abang Johari, ari Baleh udah bisi jalai nuju Belaga lalu terus ke Bintulu.
“Reti nya kitai udah bisi jalai ke nyambung Sibu ke Kapit lalu terus ke Baleh sereta Belaga.
“Ari Belaga lalu terus ke Bintulu,” ku Abang Johari.
Iya nambah, atur penyambung nya deka muka kandang pemansang di menua pesisir.
Kandang menua pesisir ku iya bisi potensyel dikemansang nengah pengawa betanam betupi nguna teknologi baru.
“Ambika chunto diatu bisi chara baru nanam pun getah alai dalam timpuh enam tahun pun ke ditanam nya ulih nyadi perengka kayu kelimpah latex.
“Igi benih getah tau dibuai ke tanah nguna penerbai drone lalu tau tumbuh kediri ketegal menua kitai bisi chukup matahari enggau ujan.
“Kita nguna teknologi baru alai tu meh entara kebuah aku meratka ekonomi digital,”ku Abang Johari.
Nitihka sumber, Abang Johari disadang meresa seraya nguji jalai Sibu ke Kapit bemutusikal kena 4 Oktober tu.
Sapit Kepala Menteri Tan Sri James Masing sereta menteri bukai disadang nyereta konvoi nya.-DayakDaily.
