KUCHING, Julai 28: Sarawak enggaika Malaysia baka tebu, manis di pun-tabar di ujung, ku Kepala Menteri Datuk Patinggi Abang Johari Tun Openg.
Ketegal nya, Abang Johari minta semua peranak Sarawak begempung dalam Gabungan Parti Sarawak (GPS) ngenanka menua.
“Aram kita sama begulai ngenanka Sarawak alai kitai enggai Malaysia baka tebu, manis di pun-tabar di ujung,” ku iya.
Abang Johari mansutka jaku nya ba Pengerami Ngelanchar GPS Zon 11 di Rumah Robert Nyumbang, Nanga Sebatu, Kapit sehari tu.
Zon 11 mungkur Sitak Kunsil Negeri (DUN) Pelagus, Katibas, Bukit Goram enggau Baleh.
Ba pengerami nya mega, Abang Johari ngemendar agih belanja RM9 juta dikena ngaga makit di Kapit enggau Song.
Ku iya, makit Kapit dianggar begunaka belanja RM5 juta alai makit Song RM4 juta.
“Tu meh pengawa GPS mai pemansang, kitai bisi pemisi lalu deka diberi pulai baru ngagai rayat nengah projek pemansang.
“Ketegal semaya udah diberi, duit (projek makit Kapit enggau Song) deka pansut dalam timpuh sebulan,” ku iya.
Kelimpah ari nya, Abang Johari mega madah diak Sapit Kepala Menteri Datuk Amar Douglas Uggah dulu agi ari tu madah deka ngaga palan ngempuru, proses sereta mungkus(CPPC) asil betanam betupi di Kapit.
Ba sentang projek jalai alun iya madah pengawa nya begunaka timpuh lalu ukai ulih digaga dalam timpuh ke pandak.
Bela datai Uggah, Sapit Kepala Menteri Tan Sri James Masing, Sekretari Besai GPS Datuk Alexander Nanta Linggi enggau bala ketuai ke bukai. — DayakDaily
