SIBU, Mei 4: Menteri Pengelantang Pendiau Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah udah nyuaka bantu pengelantang pendiau ngagai 6,197 penerima di Sibu ba Program Sejambak Kasih Hari Gawai enggau Hari Raya Aidilfitri.
Penerima nya datai ari 5,249 iku ke deka ngintu Gawai Dayak lalu 948 agi penerima bantu Aidilfitri dikena ngelempungka tating belanja sida sereta ngagaka ati penerima bantu.
Kaban Kunsil Negeri (ADUN) Dalat itu nya, perintah semampai nyendiaka beberapa skim bantua dikena nulung rayat ke kurang bepemisi.
Entara skim bantu nnya baka Bantu Orang Tuai, Bantu Anak Mit, Bantu Am, Elawin Pekereja Timpang Pendiau, Bantu Orang Timpang Pendiau (OKU) tauka Pesakit Kronik Raya, Bantu OKU Enda Ulih Gawa, Bantu Anak Ke Ditupi.
Fatimah minta rayat beserakup nempa perintah ke siru ngaga peneka enggau penanggul rayat. — DayakDaily
