102 iku kaban PNK Kabong nerima BESHN

Fisherman. — DayakDaily.com file pic. // Photo: Pixabay

KABONG, Okt 30: Bisi 102 iku kaban PNK Kabong udah nerima bayar mata duit ba Pengerami Nyuaka Bayar Elaun Penyanding Idup Orang Berikan (BESHN) Kabong ti disuaka Tan Sri William Mawan Ikom ke diatur di Dewan PNK Kabong.

Berebak enggau nya, Mawan mega lalu nyuaka bantu geran dalam chek ngagai tujuh serakup bukai di pelilih nya ke beungkus RM5,000 ngagai 10,000 ke tetiap serakup nya.

Ba pengerami nya mega Mawan lalu ngungkupka geran RM40,000 ari perintah ngagai PNK Kabong, RM40,000 ungkup komiti pengatur pengerami nya enggau Pengelantang Pendiau Orang Berikan lalu RM10,000 dikena meli rengka ke diguna ungkup bangunan baru PNK Kabong.

Lebuh ke bejaku, iya ngelalau rayat ngambika meri sukung penuh ngagai perintah diatu ti betuaika Datuk Seri Najib Tun Razak, Menteri Besai Malaysia ti semampai ngintu nasib rayat Sarawak.

Ku Mawan, perintah udah suah meri mayuh macham bantu enggau pemansang ngagai peranak menua nya dia.


Dalam taun tu perintah udah ngungkupka lebih RM3 juta dikena ngemanah 203 buah rumah peranak menua ditu.

Kelimpah ari nya RM 700,000 udah dikemendarka dikena ngaga palan penyangkai semin nampung iya ke diatu ti deka berengkah digaga ba awak ke semak.

“Perintah mega udah ngemendarka projek ngaga bangunan baru PNK Kabong ngena belanja RM500,000. Projek nya diatu benung dipejalaika lalu deka tembu pun taun baru. Agih belanja ke pemadu baru udah dikemendarka iya nya RM500,000 ungkup PNK Gerigat ke tuju dikena ngaga opis PNK di menua nya,” ku iya.

Sama bisi datai ngagai pengerami nya ADUN Kabong Mohd Chee Kadir, Pegawai LKIM Wilayah IV Betong, Abang Sapri Bawi, Chairman Gerempung Orang Berikan Sarawak (PENESA) Daud Mahdi enggau chairman PNK Kabong, Mat Jengkey Bujang.

Mawan ke diatu penyandang sitak P.205 Saratok mega ngarapka diri agi dichalun sekali agi ba sitak nya maya PRU14 tu ila. — DayakDaily