USKCS deka ke Entulu dichalun baru

KUCHING, Oct 22: Politik di Selangau majak angat lalu dipelaba meri pemar ngagai Presiden Parti Rakyat Sarawak (PRS) Tan Sri Dr James Jemut Masing.

Rayat din enda setuju enggau chara Masing deka ningkilka penyandang Datuk Joseph Entulu Belaun ti diberita agi pegari nama sereta mengkang bisi sukung ke kuat ba renggat ke baruh.

Ba pengwa bepilih besai (PRU) ke-13, Entulu bulih 12,040 undi dibanding enggau chalun Parti Keadilan Rakyat (PKR) Joshua Jabeng ke semina bulih 3,891 undi.

Raban ti nyukung Entulu ke ngelar diri, Urus Setia Saudara Kita Cawangan Sekuau (USKCS) ba sebengkah penerang media madah, pemujur nya mandangka Entulu bisi penuh ari pengundi enggau rayat di Selangau.

Menteri ba Opis Menteri Besai nya mega dipadahka sida siku ketuai ti taluk sereta kemerah enggau peranah menua nya.


“Entulu mega bisi perambu ungkup timpuh panjai ngemansangka sitak nya,” ku Chairman USKCS, Mohd Ali Abdullah ba sebengkah penerang media ditu kemari.

Selangau sitak ti diuan majoriti Iban, entara Sibu enggau Mukah.

Ba USKCS, iya siku menteri ke ngembuan visi enggau juluk rasional, sereta bisi kaul manah enggau menteri federal ke bukai.

Nya alai ku iya, iya sigi dikearap ulih mai ubah ari segi sosioekonomi, pengidup enggau pemansang di Selangau.

“Servis udu diguna rayat diatu ngambika ulih ngemanjai agenda pemansang ditu,” ku iya.

Iya mega madahka Entulu siku chalun ke ulih menang ba PRU-14 tu ila.

Bisi tiga nama disebut-sebut deka nyilih iya nyengkaum lecturer universiti, D.O enggau orang dagang. – Dayakdaily