Sarawak begunaka pemansut kuasa baru

Kepala Menteri Datuk Patinggi Abang Johari Tun Openg

BINTULU: Taja pan trend rega minyak dunya dipeda majak nurun nyentuk ke rega AS$30 setong dibanding enggau jeman maya rega tetinggi manggai ba AS$100 setong, tang nya nyadika pelasar kebuah Sarawak patut ngiga pemansut kuasa baru endur ekonomi bepanggai jemah ila.

Kepala Menteri Datuk Patinggi Abang Johari Tun Openg ngakun, perintah patut bisi medium enggau objektif kediri ba ngatur pengawa ti meri pemaik tauka ‘menang-menang’ entara Perintah Negeri enggau Petronas.

Bejaku lebuh bejadi Projek Ngaga Maktab Rendah Sains MARA (MRSM) Bintulu di Institut Kemahiran MARA (IKM) Bintulu, Abang Johari pechaya Petronas betapi enggau pemar lebuh rega petroleum ba makit global.

Nya kebuah ku Abang Johari, ba gaya ke diatu Sarawak enda ulih kelalu bepanggai ba asil minyak enggau gis.

Sarawak mega patut ngemeratka kuasa tau dikena baru baka kuasa ari tekad ai hidroelektrik, kuasa solar nyengkaum pemansut kuasa baru.


Abang Johari mega ngenang baru pasal kuasa bepelasarka hidrogen ungkup entukar enggau ke bukai, peneleba ke diulih iya maya nemuai ke Eropah baru-baru tu.

Nyebut pasal MRSM Bintulu, Abang Johari arap bendar institusi nya ukai aja nyendiaka pengereja pengawa ungkup industri minyak enggau gis aja, tang mega ulih ngisi pinta ekonomi digital.