Program Digital Kenyalang deka dipenyadi pagila

KUCHING: Menteri Pengelantang Komuniti, Orang Indu, Ruang Bilik enggau Pemansang Nembiak Mit Sarawak Dato Sri Fatimah Abdullah madahka Program Digital Kenyalang ke deka dipenyadi Kepala Menteri Datuk Patinggi Abang Johari Tun Openg ba Penview Convention Centre (PCC) Demak Laut pagila, deka meri pemaik ngaga raban pedagang mikro di Sarawak.

Ku iya, program nya ulih nulung nambahka penatai pemisi sida dalam dunya dagang nengah chara ngiri penemu ngagai bala pesereta pasal teknik ke betul iklanka produk sida nengah online nyengkaum ba laman sosial baka Facebook enggau Instagram.

Pengatur program ngarapka nerima penatai 1,000 iku pesereta ari raban orang dagang mikro ngulu program nya kelimpah deka ngerembaika program ke Pelilih Samarahan, Sri Aman, Sibu, Miri enggau Limbang.

Bejaku ba aum media bekaul program nya pagi tadi, Fatimah madahka nyentuk taun 2017, 13,118 iku pedagang mikro di nengeri tu udah bejalaika dagang sechara mit.

Tebal agi 8,643 pedagang mikro nya diadaka nengah program 1 Akhiri Zaman Miskin (1AZAM) ari baruh opis menterinya.


4,031 iku pedagang mikro ditempa nengah program Perbadanan Ekonomi Digital Malaysia (MDEC) lalu 207 iku ditempa nengah program JKM Sarawak.

Program Opis Menteri Pemansang Orang Dagang enggau Industri Sarawak nempa 146 iku lalu program Opis Orang Indu enggau Ruang Bilik mujur nempa Sarawak 91 iku, ku iya.