Politik Pemansang Nyadika Pengepun Penanggul Perintah Nengeri Ngakun Tanah NCR

Presiden PBDSB Cobbold John

Kuching – Presiden PBDS Baru, Cobbold John madah isu Tanah Adat Bansa Asal (NCR) napi pemar diputarka bepun ari agenda Politik Pemansang ke ditengkebang Tun Pehin Sri Taib Mahmud.

Ku iya, Kepala Menteri Datuk Patinggi Abang Johari Tun Openg ba sebengkah pengerami apin lama tu tadi madah Tun Taib Apai Pemansang menua Sarawak sereta muji agenda politik pemansang ti ditengkebang Tun Taib tu nyadi ka turai perintah nengeri ngemansangka menua tu.

“Penemu Politik Pemansang Tun Taib tu enda engkeman laban ngenulu ka pemansang tang enda ngira adat asal sereta daya idup sesebengkah bansa enggau pengerusak rampa menua,”ku Cobbold.

Iya nambah, raban ketuai Parti Bansa Dayak Sarawak (PBDS) ke dulu baka Dato’ Seri Daniel Tajem, Datuk Amar Leo Moggie, Harrison Ngau Laing enggau ke bukai nyengkaum Dr. James Masing ba taun 80-an enggau 90-an datai ka parti tu ditingkil ka Opis Pengerejista Gerempung ba taun 2004 mantah polisi tu.

Diatu, ku Cobbold nambah, parti tu direjista baru lalu deka nampung agenda PBDS ngetan sereta bejaku ka ungkup Dayak ba menua Sarawak.


“Sarawak tu menua ti benung ngangkat ka diri mansang lalu beguna ka sistem ekonomi ti entap ngerembai.

“Tu meh kebuah Tanah Bansa Asal dikalihka nyadi komoditi betanam ka sawit bedandang besai. Ari nya modus operandi perintah BN numbuhka Kompeni Kunsi ke alai dagang begulai entara pengempu tanah enggau kompeni.

” Ba ditu, 30% ungkup pengempu tanah, 60% enggi kompeni lalu 10% dicukai Perintah Barisan.

Ku Cobbold nambah, nya meh kebuah Kod Tanah Nengeri (SLC) diubah ba taun 2000 suba ke alai Seksyen 5 (2)(f) dipadamka.

Tuju ubah ku iya semina dikena nyapai juluk ati Perintah BN Sarawak ngambi tanah tu nyadi tanah perintah ke dikumbai “state land”.

Cobbold madah polisi politik pemansang tu meri dilemma ngagai Bansa Dayak. Pekara ti bepun ari sapa ti patut hak ekslusif ba tanah sekali ka rakyat tauka perintah?.

“Nya alai, PBDS nekang nyebut Tanah Adat Bansal (NCR) patut disukat nengah Seksyen 18 Kod Tanah Nengeri ngambi ka pengempu tanah diberi hak ekslusif.

“Tang perintah Barisan Nasional majak ka Seksyen 6 laban dikena bejalai ka politik pemansang ti ditengkebang Tun Taib”, ko Cobbold nyemetak nyebut.