MRP deka diagih berenggat kelebih agi ngagai menua pesisir

SEBUYAU: Menteri Muda Jalai Tebing Pantai, Datuk Julaihi Narawi madahka geran Projek Mit Menua Pesisir (MRP) deka majak diagih berenggat laban nya mih chara perintah mantu rayat kelebih agi di menua pesisir.

Ku iya, RM742,000 MRP udah diberi ngagai 56 buah gerempung enggau Komiti Pemansang enggau Pengelikun Genturung Pendiau (JKKK) dikena mantu sida ngaduka aktiviti enggau ngaga projek ke mit.

“Sida ke nerima geran tu, dikearap ngena duit nya memanah ngambi pulaika pemaik rayat” ku iya ke mega ADUN Sebuyau.

Tambah iya, endang nyadi juluk ati perintah besai enggau nengeri deka nentuka peranak menua pesisir enda tinggal ari pemansang.

Kuniya baru, program transformasyen menus pesisir deka terus nyadi batang agenda perintah lalu sukung bala ketuai ba renggat ke baruh beguna amat dikena nentuka program transformasyen mujur dipejalaika.