KRIS dikearap ulih ngangkat pengidup bansa Iban di mengeri

KUCHING: Sapit Kepala Menteri, Datuk Amar Douglas Uggah Embas pechaya pengawa numbuhka KRIS ulih nyaup ngangkatka pengidup bansa Iban ke diau di mengeri tu.

Bechuntoka kelab Saribas, Uggah madah kelab nya ti ditumbuh dalam taun 1993 udah mujur ngempung semua lalu udah meri pemanah,’ku iya.

“Kitai ke diau di serata Mengeri Kuching kekadang ngelui setaun enda betemu, enti betemu pan maya bisi penusah.

Ku iya, kelab nya mega nyadika platform bala raban berandau lalu nusun program pemansang.

Ku Uggah, kelab Saribas udah numbuhka koperasi sereta mega bisi muka kelas main asal baka ke kelas ngajar ngajat. Nya sebagi ari chara dikena ngangkatka pengidup kaban kelab.

Kelimpah ari nya,pekara pelajar mega dikemerat. Ninting taun kitai nyendia tuisyen ngambika ulih ngemansang bala anak ke besekula sereta meri insentif laban ngasaika pekara pelajar nyadi pekara ke pemadu beguna amat,’ku iya.

Iya ke mega Menteri Betanam Betupi Moden, Tanah Adat enggau Pemansang Kandang Menua madah ngarap KRIS ulih nempa kerejasama enggau Kelab Saribas.

Kerejasama nya tau dipungkal nengah pengawa dagang.

“Kitai tau ngepunka kerejasama tu nengah pengawa numbuhka koperasi, lalu kitai bela ngatur pengawa sereta nyukung pangan diri,’ku Uggah.

Ku Uggah,kededua Kelab ulih mai pemaik ngagai semua nitihka singkang bansa bukai nuju ekonomi digital.

‘Kitai anang enda nyingkang ba pengawa dagang,pelajar, pengidup sereta ke bukai nitihka bansa bukai,”ku iya.

Ba pengerami kemari, Uggah bisi nyuaka setipikit chiri ngagai komiti KRIS ungkup taun 2017 – 2019.

Kelimpah ari nya, aban nembiak ke nyulut ba peresa renggat sekula enggau pelajar tinggi mega bisi nerima insentif pemansang pelajar ari KRIS.