KM: Anang bemain enggau sentimen jalai pengarap

Chief Minister Datuk Patinggi Abang Johari Tun Openg

KUCHING: Pangku pengawa Bumiputera Ukai Islam dalam Kaunsil Petroleum Sarawak Berhad (Petros) tetap deka diisi, pia ku Kepala Menteri Datuk Amar Abang Johari Tun Openg.

Diatu bansa Dayak ke udah dichiri dalam kaunsil iya nya Medan Abdullah, bansa Kelabit.

Nya alai, ba pekara nyiri kaban kaunsil rayat anang bemain enggau isu jalai pengarap, ku iya lebuh dikerandau pemberita pengudah ngulu ‘Majlis Korban Perdana’ Renggat Nengeri di Masjid Darul Hana ditu,kemari.

Ku iya baru, endang amat pangku pengawa nya deka diisi tang ukai mudah deka ngiga orang ke endang amat ulih sereta mayuh peneleba ngisi pangku pengawa besai dalam kaunsil Petros ti baru ditumbuhka.

Iya mega minta rayat nengeri tu anang nundaka ulah rayat di Semenanjung Malaysia lalu anang ngaul pekara nya enggau jalai pengarap.

“Aku ngarapka rayat nengeri tu anang nundaka ulah rayat di Semenanjung Malaysia ti suah deka bemainka isu jalai pengarap lalu anang ngaul pekara tu enggau isu jalai pengarap,” ku iya.

Isu tu nyadi buah mulut kelebih ba laman sosial pengudah Opis Kepala Menteri mantaika ex-Sekretari Perintah Nengeri Sarawak, Tan Sri Hamid Bugo dichiri nyadi chairman Petros.Kelimpah ari Hamid, bela dichiri nyadi Kaban Kaunsil Direktor iya nya Datuk Mohammad Medan Abdullah, Sharbini Suhaili, Zuraimi Sabki enggau Heng Hock Cheng.

Taja pia empai lama udah, Sapit Kepala Menteri Datuk Amar Douglas Uggah Embas madahka Abang Johari udah ngasuh iya ngiga chalun Bumiputera ukai Islam ngisi pangku pengawa ke agi puang dalamKaunsil Petros.