IPG Rajang deka ditukar nyadi kolej teknikal, Vokasional ketegal nyerunyut ubah dunya

Julau MP Datuk Joseph Salang

JULAU: MP Julau Datuk Joseph Salang Gandum ngelalau mensia mayuh ngambika anang irau enggau perambu perintah ke deka nukar Institut Pematih Pengajar (IPG) Rajang ngagai Kolej Teknikal enggau Vokasional di nengeri tu.

Ku iya, nya berindik ari ubah dunya lalu pelajar teknikal enggau vokasional mayuh agi guna dibanding enggau akademik.

“Enti kitai deka nyingkang maju, kitai patut nitihka ubah dunya ke maya hari tu,” ku Salang.

Iya mega madah, nembiak ti ngembuan pelajar teknikal mudah agi bulih kereja dibanding enggau sida ke graduate dalam bidang akademik.

Nya alai juluk ati perintah ti deka numbuhka mayuh agi palan pelajar teknikal endang manah ke bala nembiak, ku iya seraya madahka perintah deka beguna agi nembiak ti ngembuan pengelandik teknikal


Ba sentang pengirau nengeri tu enda ulih nyapai juluk ngembuan 90 peratus pengajar ari nengeri tu empu, Salang madahka di menua tu sigi udah bisi universiti ti ngelatih nyadi pengajar.

Salang bejaku munyi tu lebuh bejadi Projek Simfoni Kasih 4.0 ke diatur Kolej Vokasional Betong di Rumah Selikau Nanag Selaut Tengah, Julau sehari tu tadi.