Elli Luntai bebula berita ti madahka iya deka bediri minta pilih ba PRU14

KUCHING: Chairman Gerempung Iban Remun Serian (SIRA) Elli Luntai madahka diri nadai ati minta bediri pilih ba Pengawa Bepilih Besai (PRU 14) ke deka diatur sebarang maya ari diatu baka ke dipansut ba sebengkah surat berita bedau lama udah.

Iya ke mega siku pengajar madahka diri sigi nyukung BN kelebih agi MP serian Datuk Sri Richard Riot Jaem.

Elli mega madahka diri nadai ati deka nyukung penyakal kelebih agi bediri nengah tikit ngatika diri ba pengawa bepilih besai tu ila.

” Aku ke nyadi chairman SIRA enda lantang ati laban dipadah deka bediri minta pilih nyadi chalun ngatika diri ba pengawa bepilih besai (PRU14) tu ila.

Kami Iban Remun sigi ari kelia endang nyadi penyukung kuat perintah, nya alai nadai kebuah kami nguingka diri nyukung penyakal tauka bediri nyadi chalun ngatika diri ngelaban perintah,” iya lebuh di kerandau pengarang berita lemai kemari.


Taja pia ku iya, nyema bala ketuai BN meri peluang ngagai pengari Iban bediri minta pilih ba sitak nya, sida endang nerima enggau ati tebuka laban sitak nya kenyau ari kelia nadai udah diarika siku pengari rayat bansa Iban, ku iya.