El Nino,La Nina nadai nyadi di M’sia taun tu

File picture. Peranak Rh Lembu dipindah malam tadi ketegal ampuh bah. Picture source: Pixabay

PUTRAJAYA: Menteri Pengeraja Asal enggau Rampa Menua,Datuk Seri Dr Wan Junaidi Tuanku Jaafar madah, fenomena El Nino enggau La Nina nadai nyadi menua Malaysia taun tu.

Ku iya, bepelasarka ripot ari Opis Meteorologi Malaysia (MetMalaysia), menua dipelaba nerima penyampau ujan baka selama ungkup timpuh September enggau Oktober taun tu, kelimpah nadai ngasaika tikas pengangat ke nyelai sereta kemarau enggau sebun asap ti kelalu balat.

“Pelaba MetMalaysia nadai salah kenyau ari taun siti nyin tadi lalu aku pechayaka pekara tu,” ku iya ba aum media pengudah nyadi chairman aum Komiti Besai Sebun Asap enggau Gaya Hari ti Rangkai Menua Bil 2 Taun 2017 kemari.

Ku Wan Junaidi baru, aum nya mega setuju matau silik kandang endur ke bisi tanah kerapa ti suah angus nengah chara ngidupka baru Prosedur Tetap Operasyen Program Nyeliah Penusah Angus enggau Ngaduka Tanah Kerapa Ti Suah Angus.