Budah Anchah mai pulai dua midul ari Seoul Korea

KUCHING: Buda Anchah, Atlit gumpal isi Malaysia, 45, bansa Iban ke beasal ari Sri Aman udah mujur mai pulai dua midul pirak enggau engkeraju ba ’51th Asian Bodybuilding Championships’ di Seoul, Korea Selatan
empai lama tu tadi.

Pemujur nya nyadika peransang ngagai Buda nagit bulih midul emas ba pekit ‘Mr Universe’ ke deka diatur di Mongolia dalam bulan Oktober tu.

“Aku endang nagit bulih midul emas, taja pia enti ulih penuduk lumur dua tauka tiga pan mega ngemuaska ati, pemujur ba Seoul tu nyadika peransang aku nagit bulih midul emas di Mongolia” ku iya.

Ba pekit ke baru tembu di Seoul, Buda udah mujur bulih midul pirak dalam kategori Lightweight enggau engkeraju ba kategori Master.

Ba ’51th Asian Bodybuilding Championships’ di Seoul,Korea Selatan, Sarawak mega diarika siku agi atlit iya nya Malvern Abdullah ke bulih midul emas dalam kategori Flyweight lalu Awang Mohd Azizul bulih engkeraju ba kategori welterweight.