Bida gaji sektor peribit di Semenanjung, Sabah, S’wak enggau Labuan deka disebela


PUTRAJAYA: Perintah nguji deka ngerapitka seraka gaji minimum pekereja sektor peribit di Semenanjung sereta Sabah, Sarawak enggau Labuan, enggau juluk nya ulih disebela ila.

Menteri Pengatur Pengereja Pengawa Datuk Seri Richard Riot madah, lebuh polisi gaji minimum sektor peribit keterubah dipejalaika ba taun 2013, gaji minimum ungkup pekereja di Semenanjung iya nya RM900, di Sabah, Sarawak enggau Labuan semina RM800.

Taja pia ku iya, bida RM100 nya mujur dikurang ngagai RM80 taun nyin tadi, pengudah gaji minimum di Semenanjung ditetapka RM1,000 lalu di Sabah, Sarawak enggau Labuan RM920.

“Nya siti ati singkang perintah dikena nentuka gaji minimum pekereja peribit di menua tu ulih disebela jemah ila,” ku iya pengudah nyuaka surat nyiri kaban Majlis Perundingan Gaji Negara (MPGN) ditu, empai lama.

Ku Richard, MPGN mega udah berengkah nyendiaka perambu nyerenih baru Perintah Gaji Minimum 2016, ti deka ditukuka tengah taun baru.


“Pekara tu setipak enggau Akta Majlis Perundingan Gaji Negara 2011 ti netapka perintah nya patut diserenih baru ambis nadai sekali dalam timpuh dua taun.

“Perintah mega setuju numbuhka Raban Pemansik Gaji enggau Gaji Minimum dikena mantu MPGN sereta Komiti Teknikal Perundingan Gaji Negara (JTPGN) mansik empas nya,” ku iya.

Iya mega madah, opis menteri nya mega bisi nyendiaka medium endur bekunsi sentang gaji minimum dalam portal Gaji Minimum dikena ngulihka penemu sereta timbal ari mensia mayuh, ke deka diguna dalam proses nyerenih baru Perintah Gaji Minimum 2016.

Ba pengerami nya, bisi 25 iku raban MPGN nerima surat chiri ungkup timpuh 2017 nyentuk 2020, ti deka bechairmanka Tan Sri Steve Shim Lip Kiong.

Share this article!