Bajet 2018: Sektor betanam betupi diungkupka RM6.5 bilion

Budget 2018 was announced on Oct 27, 2017.

Bajet 2018: Sektor betanam betupi diungkupka RM6.5 bilion

KUALA LUMPUR: Ba pengawa ngenegapka sereta ngemajuka sektor betanam betupi menua, perintah ngungkupka RM6.5 bilion dalam Bajet 2018, ke deka meri pemaik ngagai orang ti ngaul diri dalam sektor betanam betupi nyengkaum orang bumai, pekebun, pekebun mit, orang berikan enggau betupi.

Lebuh bejuraika bajet nya di Dewan Rakyat kemari, Menteri Besai Datuk Seri Najib Tun Razak madahka RM2.3 bilion diberi ari sukut bantu enggau insentif baka baja sereta input pemansut ngagai orang bumai, pekebun mit getah enggau orang berikan kelimpah nyauka RM500 juta dikena ngemanah infrastruktur entali ai ba kaa kandang endur betanam sereta ngangkatmanah jalai kebun bedandang besai.

Kelimpah ari nya, Najib ke mega Menteri Wang madahka nyauka RM200 juta diungkup ke program nanam baru getah sereta nyendiaka infrastruktur ti nambahka pemansut tusu getah dibanding getah beku mangkuk, ke lalu nyungkak penatai pemisi bala pekebun mit.

Bela bisi dipadah iya nya agih belanja ke nyauka manggai RM140 juta ungkup program pemansang sereta nanam baru sawit tnyengkaum promosi, ku Najib, dalam Bajet 2018 ti berambaika leka jaku ‘Memakmur Ekonomi Yang Inklusif, Mengimbang Keunggulan Duniawi dan Ukhrawi Demi Mensejahtera Kehidupan Rakyat, Menuju Aspirasi Transformasi Nasional 2050 (TN50)’ nya.


Ku iya, ba pengawa ngenegapka sektor betanam betupi, bisi RM200 juta disedia ungkup inisiatif Pemansut Pengaya Baru, kelebih agi ba pengawa nanam jagung lingkau, nyiur, rian enggau sektor kulinari sereta industri pemansut tusu nengah pengawa numbuhka Lembaga ‘Tenusu enggau Ruminan’.

“Ambika chunto, di Hong Kong, rega rian Musang King diberitaka manggai RM800 seigi,” ku Najib.

Menteri Besai nya mega madah perintah mega deka nengkebang sebengkah skim semina ungkup program ngangkatka pemansut nyiur nengah chara nanaman baru nyiur variasi baru ari bansa CARECA enggau MATAG ngena ungkup belanja RM50 juta ke deka meri pemaik ngagai 10,000 iku pekebun mit.

Ku iya, pengawa ngatur sereta ngemata industri nyiur nya mega deka digempung ari baruh siti komiti begulai enggau industri nenas sereta buah.

Najib mega bisi madahka meri bantu RM200 sebulan ungkup timpuh tiga bulan sementara ngaanti asil padi ke diketau ke alai agih belanja ungkup orang bumai nya nyauka manggai RM150 juta.

Share this article!