Abang Jo “Hot Air” bekaul isu Direktor Petros

Presiden PBDSB Cobbold John

KUCHING: Presiden Parti Bansa Dayak Sarawak (PBDS Baru), Cobbold John madah, Kepala Menteri Datuk Amar Abang Johari Tun Openg, ngembuan penemu ti nyempelah.

Cobbold mansutka penerang tu nimbal sebengkah penerang ti dipansutka Abang Johari ti mejah sekeda piak ari ti bemain enggau isu pekara pengarap ba isu Direktor Petros.

“Penemu Abang Johari tu ‘hot air’. Nadai piak Parti Dayak kala nyebut isu ti bekaul enggau pekara pengarap ba isu ti bekaul enggau Direktor Petros ti dipaduka Perintah Nengeri Sarawak” ku Cobbold.

Ku Cobbold nambah, orang ti mansutka penemu ti bekaul enggau isu pengarap tu iya nya Menteri Muda Pekara Koperat, Abdullah Saidol ke alai iya bisi nyebut Bumiputera Ukai Islam deka dipadu mangku pengawa Direktor Petros.

Cobbold mega madah, penerang Abdullah Saidol tu mejah penemu Datuk Amar Douglas Uggah, ke alai Abdullah Saidol nyekang penemu Uggah ti madahka diri diasuh Kepala Menteri, ngiga seiku Bumiputera Ukai Islam nyadi direktor Petros.

“Penemu sida PBB tu betelisih enggau pangan diri. Kelimpah, penemu nembiak PBB (Abdullah Saidol), ngemaruhka Uggah ke mega Sapit Kepala Menteri ,”tandu Cobbold.

“Nya alai, sapa ti bekuasa meri jaku pemutus dalam PBB? Lalu bisi PBB betanya ngagai kabinet sereta gempung BN Sarawak? Ku Cobbold nyemetak madah.

Ngenang kaul ke sama, Cobbold madahka pekara nya nadai bekaul enggau pekara pengarap.

Tang ku iya, isu Direktor Petros tu mandangka Perintah BN Nengeri Sarawak tu lemi, sereta semua pemutus ba jari PBB magang.

“Peranak pupu bansa menua Sarawak diatu patut muka mata ba pekara ti udah nyadi.

“Isu polisi bechiping ukai semina nyadi ba tikas Petros aja, tang mega mayuh pangku pengawa ke patut dibagi sama rata nitih ka komposisi pupu raban bansa ti nguan menua Sarawak,”ku Cobbold.